الرئيسية
* 19 *
يوم الاثنين
وانا بالمدرسة وفي نهاية الدوام ,,, ابراهيم وماجد وصالح ناشبين بحلقي تحقيق عن اللي صار امس لكن بشكل مفصل ,,, كيف صادفوكم ووش يبون من خالد وليه وكيف وربما وعسى
افففف مالي خلق لهم والبارح مانمت زين ,, طوال الليل وانا اتقلب بفراشي ,,, افكر باللي صار امس من دون مايذكروني هم
ماجد = يعني سيارة خالد الحين واقفة عند المقهى .؟
انا بملل = ايه وين بتكون يعني اقولك صادفونا هناك وركبنا سيارتهم مايبيلها سؤال بعد انت
ابراهيم = اجل بعد ماطلع من المدرسة بنروح انا وماجد لمكانكم هناك ورا المحطة
انا مستغرب = ليه .؟
ماجد = سألت الممرضين امس عن اغراض خالد جواله ومحفظته ومفاتيحه قالوا مامعه شي
ابراهيم = عشان كذا انا وماجد بنروح للمكانكم امس ونشوف يمكن نلقى شي
تذكرت يوم واحد منهم يفتش جيوب بنطلون خالد
انا = ماظن بتلقون شي من اغراضه ,,, امس شفت واحد منهم يفتش بجيوب خالد
صالح = مو تقولون انهم عيال نعمة يمكن يفتشون يبون شي ثاني من خالد مو شرط جواله وسيارته صح والا لا .؟
انا بملل = مدري كيفكم ( والتفتت لصالح ) وانت بتروح معهم .؟
صالح = لا ابوي وابو عبد الله بيروحون يزورون خالد بالمستشفى وانا اللي بوديهم
انا مستغرب = ابو عبد الله مازار خالد الى الحين .؟
صالح = الا اتصلت على ابوعبد الله الساعة ثمان يقول راح بس منعه الدكتور عن الزيارة يقول نفسية خالد تعبانة غير عطوه مهدي وقال ان الدكتور راح يسمح له بزيارته العصر
نزلت راسي بألم ,,, نفسية خالد تعبانة .؟ من وش بالضبط ,,, اصلا حياة خالد كلها متعبة
رفعت راسي لصالح
انا بحزن = مرني العصر بروح ازوره معكم
صالح = ودوامك
انا بعصبية = يولّي ,,, مرني وبس
ورحت عنهم متنرفز
دخلت الشقة ولقيت خلود بالمطبخ ,,, سلمت ولا ردت ,,, يقالها زعلانة ,,, اليوم ماكلمتني وانا بعد ماحاولت اكلمها
وتغدينا وحنا على هالحال
العصر
دخلنا المستشفى انا وصالح وابوه وابو عبد الله ,,, انا عن نفسي كنت متردد مالي وجه اقابل خالد ,,, كنت امشي وراهم وتفكيري مشغول وشلون اتسامح منه ,,,
وصلنا غرفته ودخلوا وانا مازلت متردد مالي وجه اقابله ,,, لكن اخر شي توكلت على الله ودخلت
شفت ابو عبد الله منحني على خالد يسلم عليه ويكلمه وصالح وابوه يحترونه يخلص
واخيرا ابتعد ابو عبد الله عنه لكن استلمه ابو محمد ( ابو صالح ) على طول وبعده سلم صويلح ,,, واخيرا جا دوري وانا مازلت واقف عند الباب ,,, التفت لي خالد وقربت عنده وكني شفت شبح ابتسامة منه
انحنيت
انا = الحمد الله على سلامتك
وسلمت عليه و بعدها قربت فمي من اذنه عشان مايسمعنا البقية
انا بهمس = سامحني ياغالي ,,, لو فيني خير لك ماكان صار اللي صار
ورفعت راسي عنه اطالعه ,,, لقيته مقطب حواجبه مستغرب
كان واضح على وجهه التعب وانفاسه مسموعة كنه محموم مع ان جسمه مو حار
جا بيرد علي بس قاطعه ابو محمد
ابو محمد = الحمد الله على سلامتك ياولدي وابتعد عن العيال الفاسدة ,,, ترا مايجي من وراهم الا عوار الراس
التفت خالد لبومحمد
خالد بهمس = خلاص طحت بالماء العكر
ماسمعه ابو محمد
ابو محمد = وشو
ابو عبد الله = ماحنا ساكتين عنهم ,,, رحت اليوم الصبح للضابط يقول الى الحين ماقبضوا عليهم بس طمني ,,, يقول اسماءهم وعنوانين بيتهم معروفة ,, يوم والا يومين وهم ممسوكين ان شاء الله
ابو محمد = عرفتوا اسم الرابع .؟
ابو عبد الله = انا ماعرفه والضابط جا اليوم لخالد بس منعنا الدكتور نشوفه ( والتفت لخالد ) صح نسيت اعلمك ترا الضابط يقول بيزورك العصر اظنه بيجي بعد شوي
طوال مايتناقشون ابو عبد الله وابو محمد وخالد كل شوي يغمض عيونه بقوة و بألم
حطيت يدي على راسه وانحنيت عليه شوي
انا بهمس = خالد شكلك تعبان ,,, انادي الدكتور
رفع بصره لي
خالد بتعب = صدري ,,,, مكان الخياطة يعورني واحس بكتمة وكل ماحاولت اخذ نفس عورني صدري اكثر ( والتفت لشيبان شوي وبعدها رفع بصره يطالعني ورسم ابتسامة تعبانة على شفايفه ) الحمد الله على سلامتك من يوم ماصحيت وانا بالي مشغول فيك مادري وش صار عليك ,,, وبغيت اتصل عليك بس جوالي مدري وينه
انا بمزح = انت المستهدف ,,, المهم انادي الدكتور .؟
خالد وهو يغمض بقوة = لا ,,, خلها مستورة اخاف يجيب العيد
استغربت ,,, وش اللي يجيب العيد ,,, وش اللي المستورة ,, وش يقول هذا
انا بعدم استيعاب = هاااه .؟ من اللي يجيب العيد .؟ وش تقول انت .؟
خالد بضيق = انا بخير مايحتاج دكتور
التفت اطالع رجله اليسرى
انا = وشلون رجلك الحين .؟
خالد = تعورني ,,, سووا اشعة لها اليوم والحمد الله سليمة مافيها كسر بس ماقدر احركها احسها متورمة
انا = يبيلها وقت وتخف ان شاء الله
فجأة دخلوا ابراهيم وماجد وابو فايز وفايز
وبعد السلام والسؤال بدوا الشيبان بإلقاء النصائح علينا واخذ العظة والعبرة خاصة ان اكثر الموجودين من الشباب وماخلوا علينا شي الا وقالوه وبعد ماشبعوا منا بدوا بسوالفهم الخاصة
قرب ابراهيم من سرير خالد ومد له اغراضه
ابراهيم = لقيت جوالك والمحفظة هذي اظنها محفظتك اما مفاتيح السيارة مالقيتها
مد خالد يده السليمة واخذهن
ابراهيم = جوالك نص الشاشة منكسرة
القى خالد نظرة على جواله وبعدها تفحص المحفظة
خالد بضيق = اوووووه ماخذين بطاقاتي
ماجد = اهم شي سلامتك والبطاقات تقدر تطلع بدالهم بدل فاقد
صالح بعصبية = صدق انهم مبزرة
بعد ربع ساعة جا الضابط والعسكري اللي معه ,,, سأل خالد كم سؤال بسيط
الضابط = الصراحة عندي اخبار للاسف ماهي من صالحكم
ابو عبد الله بخوف = عسى خير
الضابط = المعتدين سافروا للرياض ليلة الحادث وتم اليوم القبض على ثلاثة منهم هناك وهم بالتوقيف الان والرابع عرفنا معلوماته و بيتم القبض عليه قريب ان شاء الله ,, لكن للاسف الخبر اللي وصلني مايسر ,,, مدير المركز الموقوفين عنده هو نفسه والد واحد منهم
سكتنا كلنا شوي
شكلهم سافروا للرياض لأنهم يعرفون انهم راح ينمسكون وقالوا ننمسك هناك احسن ,,,, حسبي الله عليهم ,,, عارفين انهم بيطلعون منها مثل الشعرة من العجين
خالد بتعب = مافيه شي جديد
التفت الضابط لخالد
الضابط = الحين هم بالتوقيف وبما انك تعبان خل ولي امرك يروح يتابع القضية بالرياض
خالد = مايحتاج ,, ماهي اول مرة يدخلون التوقيف واحسب اسبوع اسبوعين وتلقاهم طالعين
فايز بعصبية = وش فيك فاقد الامل ياخي خلنا نجرب هالمرة مانت خاسر شي
التفتت لبو عبد الله ولقيت وجه متغير وعلى ملامحه الخوف وساكت ماعلق
الضابط = انت جرب هالمرة و الحق معك ,,, صح واسطتهم قوية بس انت توكل على الله وان شاء الله تاخذ حقك منهم
صالح = خاااالد تبيني اروح عنك ,,, اكفخهم لك واجي
الضابط بعصبية = تشوف الدنيا سايبة
خالد بتعب = اصبروا اسبوع ,,, وليش تصبرون اسبوع يمديهم طلعوا الحين
الضابط بابتسامة = حتى لو طلعوا ,,, بكمين بسيط نقدر نقبض عليهم وهنا بمنطقتنا ,,, لا تيأس امرهم بسيط جدا
خالد مستغرب = كمين .؟
ابو عبد الله بعصبية = لا كمين ولا غيره ,,, تبون تسوون كمين سووه بعيد عن ولدي
الضابط = بس ماحد يقدر يستدرجهم هنا الا ولدك ياخال ,, والحمد اللـ
ابو عبد الله بعصبية شديدة = قلت لا يعني لا ,,, اذا كان مافيكم خير ابعدوا عن ولدي خلاص مانبي منكم شي ,,, انا فقدت عيالي قدام عيني ماني مستعد اضحي بخالد ( وتغير صوته ) مابقي لي بهالدنيا الا هو واخواته ,,, وليدي ابـ
وسكت يجاهد دمعته عن تطلع قدام الموجودين ,,, مسكين الضابط انصدم
الضابط بصدمة = فقدت عيالك .؟
قرب منه فايز وهمس باذنه شوي وبعدها
الضابط بتنهيدة = لا حول ولا قوة الا بالله ( احس انه بلش بابو عبد الله ) عموما هالموضوع سابق لأوانه ,,, هم الان بالتوقيف وخالد حاليا تعبان وبحاجة للراحة
وسلم على خالد مرة ثانية وطلع
التفت ابو عبد الله لخالد بحيرة وخوف
ابو عبد الله = ماحنا ساكتين ياولدي ,,, اليوم بروح للرياض واتابع الموضوع
خالد بتعب = لا تتعب نفسك ياخال ,,, مايحتاج تروح
ابو عبد الله = الا يحتاج ,,, انا هالضابط ذا الله اعلم عنه مارتحتله ( وقام قرّب لسرير خالد ) أي شي يقوله لك هالضابط لا تسمع كلامه ياوليدي ماعـ
ابو فايز = وش هالكلام يابو عبد الله ,,, الله يهديك ,,, الضابط يبي مصلحة ولدك
ابو عبد الله بعصبية = مصلحة ولدي يحطه كمين .؟ ,,, ياخذ العسكري اللي معه ,,, خالد ماهو ماشي على كيفهم
سمعت ماجد يهمس عشان يسمعه اللي قريبين منه بس
ماجد بهمس = وش هالانانية حتى العساكر لهم اهل يبونهم
ابراهيم = العساكر عليهم القبض وبس اما الكمين يابو عبد الله بس استدراج للمعتدين عشان يجون هنا ,,, مافيه خطورة على خالد ولا شي ,,, لا تكبر الموضوع
فايز = وبعدين تراهم مبزرة ,,, القبض عليهم سهل ,,, خاصة ان اسمائهم معروفة واهاليهم معروفين
التفت ابو عبد الله لخالد مطنش البقية
ابو عبد الله بعصبية = لا تسمع كلام هالضابط ولا غيره ,,, تسمع .؟
مارد عليه خالد ومازال ساكت
ابو عبد الله بعصبية = تسمع والا بتعصاني .؟
خالد بتعب = اسمع ,, اللي تبيه ياخال بيصير ,,, بس مايحتاج تروح للرياض ,,, مابي اهلي يشكون
سكت ابو عبد الله شوي وبعدها مسح على شعر خالد بحنان
عبد الله = الزم ماعلي سلامتك ,,, لو ادخل على مدير المركز اللي هم فيه ,,, المهم يبعدون عنك واهلك اجيب لهم أي عذر
ابو محمد = خالد معه حق يابو عبد الله ,,, وش رايك انا اروح عنك واتابع الموضوع هناك
خالد = صدقوني ياجماعة مايحتاج
فايز بعصبية = انت معلق على مايحتاج
صالح = افصل فيشه واشبكه مرة ثانية يمكن يزين هاهاها
ويوم شاف ماحد ضحك سكت يلقط وجهه
اخذنا شوي وطلعنا وخالد مصر ماحد يروح خاصة خاله ابو عبد الله ,,, الولد يائس
رجعت الشقة بعد صلاة المغرب ولقيت خلود قاعدة ومعها الاب توب وتطقطق
سلمت وردت بس بدون نفس
جلست وجاني معاذ وجلسته بحضني ,,, صح تذكرت ,,, بحثي وش صارعليه واليوم الاثنين ,,, التفتت لخلود اسألها
انا = خلصتي من البحث .؟
خلود = ايه بس باقي الخاتمة والفهرس والمقدمة سوه انت
الله كل هذا زعل ,,, افففف لازم نسلّك
انا = امممم طيب وش تسوين انتي الحين .؟
خلود وهي تطقطق = داخله على الانترنت
ابتسمت داخله على الانترنت بلاب توب اللي دعت عليه
انا = امممم تدرين من لاب توبه هذا .؟
التفتت لي خلود بنص عين ,,, وتوسعت ابتسامتي تسليك لعصبيتها
خلود بنص عين = ادري ,,, خويك خااالد
رفعت حواجبي مستغرب وشلون عرفت ,,, انا متأكد ماعلمتها ,,, يوم جيت من الرياض سألتني عن الاب توب اللي معي وقلت علي بحث وقالت انا اسويه لك وعطيتها الاب توب من دون ماتعرف منهو صاحبه اصلا هي ماسألتني
انا مستغرب = كيف عرفتي .؟
خلود = سلمى علمتني
التفتت لسلمى اللي معطيتني ظهرها هي وسالم يلعبون بلي ستيشن ,,, بسم الله الرحمن الرحيم وش يدريها هالمفعصوة ذي ,,, التفتت مرة ثانية لخلود
انا مستغرب = سلمى .؟
التفتت خلود للاب توب وضغطت فيه شوي وبعدها وجهت الاب توب لي عشان اشوفه
شفت سطح المكتب وضحكت
انا = هههههههههههههههههههههههههههههههههه
خلود بسخرية = خويك معجب بنفسه بكل مكان فيه صورة له ,,, المستندات وسطح المكتب ومدري وين بعد ,,, شافت سلمى الصورة وعلمتني انه خويك المغرور ,,, بسم الله شكله يخرّع مدري على وش معجب بنفسه
حرام عليها خالد مايخرع ,,, صح موب وسيم لكن شكله عادي ومقبول ويهتم بنفسه كثير وابتسامته العذبة اللي دايم يرسمها بوجهه محليته ,,, لكن خلود مدري وش جاها عليه ,, ماتداني طاريه
بس عادي عندي تدانيه والا ماتدانيه ,,, خالد غالي عندي ومو بس عندي عند سالم وسلمى ومعاذ بعد
خلود = غريبة اليوم طالع بدري
صح انا نسيت اقولها اني ماني رايح للدوام اليوم ولا علمتها اصلا ان خالد بالمستشفى ,,, يوم الحادث انا وهي تهاوشنا وبعدها محد كلم الثاني
انا = مارحت اليوم للدوام
خلود مستغربة = ليه .؟
انا = رحت ازور خالد بالمستشفى
طيرت عيونها فيني
خلود مستغربة = بالمستشفى ,,, ليه .؟ هذا يإما ضايع يإما مغمى عليه ببيتنا يإما بالمستشفى ,,, وش عنده بعد
وعلمتها باللي صار بالمختصر
خلود = انتم يالعيال ماعندكم الا عنف و ماتتفاهمون الا بالدم ,,, ياحليلنا حنا يالبنات اذا وحدة بغت تنتقم من الثانية مطت شعرة شعرتين وانتهى الموضوع ههههههههه
انا = ههههههههههههههههههههههههههههههههههه انتم ماتتفاهمون الا بالشعر
بعد صلاة العشا اخذت الاب توب من خلود وكملت بحثي
اففففففففففففف ياحياة الشقا ,,, بكرة علي دوامين ,,,
يوم الثلاثاء
العصر وانا بالدوام طلبني المدير يشوفني ,,, الله يستر,,, هو يهاوش من دون شي وشلون الحين وانا غايب امس وبدون استئذان بعد ,, الله يستر
توكلت على الله ورحت عنده
انا = آمر طلبت تشوفني
المدير = ليه امس ماداومت .؟
انا مرتبك = آآآآآ ,,, اخوي بالمستشفى ورحت ازوره واتطمن عليه
وانا ماكذبت خالد اخوي في الاسلام ,,, و رب اخ لك لم تلده امك ,,, ايه ايه انا ماكذبت
المدير = وليه ماجيت تستأذن .؟
لأني مابي اشوف خشتك ,,, طبعا قلتي بصدري مالي جرأة اقولها بوجهه
المدير وبدا يعصب = ليه ماجيت تستأذن .؟
مازالت ساكت ,, شاقول بالله .؟
يوم ماشاف مني رد ,, فتح درجه وطلع مضروف ومده لي
المدير = استغنينا عن خدماتك وهذي باقي مستحقاتك ,,, تفضل
انصدمت
انا بصدمة = لـ لـ ,,, ليه ,,, آآآآ ,,, وش سويت .؟
المدير = اخطائك كثيرة وفوق هذا غياب بدون استئذان ,,, تفضل
انا وشوي اصيح من الصدمة = آآآ ,,, امس اضــ
المدير بعصبية = عندي شغل ,,, تفضل
اخذت المضروف وطلعت وانا مهموم ,,,, لاااا ,,, وين اروح ,,, ماحصلت الوظيفة هذي الا بعد طلوع الروح ,,, وين اروح وييييين
رجعت الشقة وحبست نفسي بغرفتي مابي اشوف احد ماااااابي ,,,, شسوات الحين .؟ من وين احصل وظيفة ثانية من ويييييييين .؟
مر يوم الاربعاء وانا من غرفتي للمسجد ومن المسجد لغرفتي ,,, حتى اخواني ماجلست معهم حتى المدرسة مارحت لها
الساعة عشر في الليل جاني اتصال من ناصر
انصدمت ناااصر ,,, وش يبي ذا ,,, يالله احس مر عليه سنة ,,, من يوم صار حادث خالد وانا ناسيه وناسي سالفته
انا بضيق = نعم
ناصر = السلام عليكم
انا = وعليكم السلام
ناصر = امممم وش صار على موضوعنا
الشرهة على اللي تذكرك وتذكر موضوعك
انا بضيق = أي موضوع .؟
سكت ناصر شوي
ناصر = ماقنعت خالد تركي باللي قلتلك .؟ مر اسبوع على كلامنا
انا بعصبية = الرجال متمسك برزقه ,,, وش تبي فيه ,, ياخي تبي عيادة افتح لك بنفسك ,,, والا اذا كنت تبي ادارة وينلي ,,, من الحين اقولك خالد مايبيه ولا يبي خشته ,, حوّل كفالته لك وعينه عندك
ناصر = انا ابي العيادة بكبرها وباللي فيها ,,, مكانها مناسب ومشهورة ومتكاملة ,,, والاخ خالد تركي مجرد طالب مابعد تخرج ,,, والعيادة انا اولى فيها منه
انا بعصبية = لا ياشيخ
ناصر = امممم افهم انك ماكلمته بالموضوع .؟
انا بعصبية = ايه ماكلمته ولاني مكلمه
ناصر = انت المستفيد ,,, 100 ألف حلالك
يقهرني بروده وهدوئه كنه واثق
انا بعصبية = مابي استفيد شي من ورااااك ,,, وش بتسوي يعني
ناصر = مستعد تخسر وظيفتك .؟
انا بسخرية = هه خسرتها وانتهى الموضوع ,,, اذلف
وسكرت الجوال بوجهه
100 الف ,,, وااااااااو 100 الف اقدر افتح لي مشروع اممم طيب ليه ماقنع خالد
مسكت راسي احاول ابعد كلام الشيطان عني
انا = لا لا لا لا ,,, رشوه ياخالد رشوه
رن جوالي مرة ثانية وكان ناصر ,,, افففففففف شديت شعري ,,, نشبة نشششششبة
رديت عليه وصارخت بوجهه
انا بصراخ = نعععععععم ,,, وش تبي انت وش تبي
ناصر بهدوء = ممكن اقبالك ضروري
تفاجأت وش يبي يقابلني ,,, بس رغم هذا صارخت بوجهه
انا بصراخ = لااااااااا
وسكرت بوجهه
ورجع اتصل مرة ثانية
انا بعصبية = وش تبي ياعلقم
ناصر = اذا كنت تبي مصلحة خويك اللي توسط لك بالوظيفة ,, ضروري اقابلك
انا بعصبية = انا ماني بالرياض
ناصر = تقدر تجي .؟
انا بعصبية = اللي يبيني يجيني
وسكرت بوجهه
بعد ساعتين جتني رسالة على جوالي وكان من نويصر
(( بسيطة
حاليا مشغول ولااقدر اسافر
اسبوعين بالكثير واكون بالقصيم
اتمنى اشوفك ))
فتحت فمي بصدمة ,,, بيمسك خط بس عشان يقابلني ,,,
هه حسيت اني مهم
